Lëvizja Vetëvendosje doli fituese absolute në zgjedhjet e së dielës, duke arritur t’i marrë mbi 50 deputetë, ende pa u numëruar votat me kusht dhe ato të diasporës. Mirëpo, këta deputetë ende nuk janë të mjaftueshëm që kjo parti t’i formoj institucionet, shkruan GazetaBlic.Por, partia e Albin Kurti s’e ka në mendje që të bëjë koalicion paszgjedhor me ndonjë parti politike, përveç bashkëpunimet me pakicat joserbe.Kështu ka thënë për GazetaBlic zëdhënësi i Lëvizjes Vetëvendosje, Përparim Kryeziu.
“Rezultati i zgjedhjeve të 14 shkurtit është historik jo vetëm për nga numrat por edhe për nga domethënia e tij. Qytetarët asnjëherë më parë nuk kanë qenë më të prerë e më të qartë se duan ndryshim rrënjësor si në politike-bërje ashtu edhe në qeverisje. Prandaj reforma në subjektet tjera është e domosdoshme. Ajo më së mirë arrihet në opozitë. Ne presim që të kemi numrin e nevojshëm të deputetëve për formimin e qeverisë dhe institucioneve. Do të presim të shohim edhe deputetët e tjerë të komuniteteve jo-serbe dhe kështu të fillojmë bashkëpunimin drejt formimit të institucioneve të vendit”, është shprehur Kryeziu.
Për formimin e Qeverisë së Kosovës nevojiten 61 deputetë, ndërkohë që për të parin e shtetit duhen 81 deputetë.Sipas të dhënave preliminare të Komisionit Qendror të Zgjedhjeve, për zgjedhjet parlamentare të mbajtura më 14 shkurt 2021, Lëvizja Vetëvendosje e udhëhequr nga Albin Kurti, fitoi rreth 48 për qind, pasuar nga Partia Demokratike e Kosovës me 17.35 për qind.
E treta është radhitur Lidhja Demokratike e Kosovës me 13.18 për qind dhe në vendin e katërt është Aleanca për Ardhmërinë e Kosovës me 7.42 për qind./GazetaBlic