Kryeministri i vendit, Albin Kurti ka folur rreth vizitës së kryeministres së Serbisë, Ana Brnabiq e cila pritet që të hënën të jetë në veri të Mitrovicës.
Kurti tha se kjo kërkesë nga Serbia erdhi pasi zyrtarët e Kosovës, pritet që po në atë ditë ta vizitojnë Luginën e Preshevës, Medvegjën dhe Bujanovcin.
Ai tha se këtë agjendë ata e kishin paraparë më herët.
“Agjenda jonë qeveritare qysh më herët e ka parapa një vizitë në Luginë, dhe zyrtarët tanë do të shkojnë të hënën. Unë do shkojë një ditë, por nuk është shkuarja jonë reagim. Përshtypja ime është që kur ata e kanë kuptuar që zyrtarët tanë do të shkojnë të hënën, pastaj ata e kanë bërë kërkesën që të vij Ana Brnabiq në veri të Mitrovicës, veçanërisht në Leposaviq”, ka thënë ai.
Kurti po ashtu foli edhe për marrëveshjen e targave dhe të letërnjoftimeve të cilat tashmë janë duke u ekzekutuar në dy anët e kufijve.
Ai tha se kur të hyjë në Kosovës, kryeministrja e Serbisë do ta kuptojë që çdo gjë po funksionin siç duhet.
“Së pari jemi pas 1 shtatorit dhe është parë që po shkon siç kemi thënë më herët. Ose do të ketë dokumente hyrëse – dalëse edhe në anën e kufirit, Kosovë-Serbi, ose në asnjërën prej tyre. Edhe Brnabiq le të hyjë në Kosovë me letërnjoftimin e lëshuar nga autoritetet e Beogradit dhe le ta shohin se gjithçka po funksionon si një shtet demokratik, i cili është edhe më demokratik se Serbia gjithsesi, por madje dhe më i pavarur se Serbia”, tha ai.
I pyetur se cila është ecuria pasi të kaloj afati i marrëveshjes për targa dhe letërnjoftime, ai tha: “Sa i përket targave ne do të bëjmë më të mirën e mundshme. Sa i përket aspektit diplomatik e politik, mirëpo unë i ftoj të gjithë qytetarët e komunitetit serb në Kosovë, që kanë targa, KM, PR, etj që t’i konvertojnë sa më parë, sepse i kanë këto dy muaj për t’i përfituar deri në pesë mijë euro, duke mos paguar, TVSH, taksë, akcizë doganore.
Afati është 31 tetori siç e kemi deklaruar. Sa më parë që e bëjnë këto, jo vetëm që është e mirë për shtetin tonë dhe ligjshmërinë, por edhe për ata vetë. Ata përfitojnë nga kjo, nuk humbin. Bëhet fjalë për disa mijëra vetura. Pasi një pjesë e madhe e serbëve të Kosovës, i kanë targat ashtu siç i kanë dhe letërnjoftimet e Kosovës. Vetëm disa mijëra nuk i kanë targat dhe letërnjoftimet”. /Telegrafi/