Dy zyrtarë policorë u sulmuan të shtunën rreth mesnatës në Skenderaj, njëri nga ta u plagos me armë e tjetri pësoi lëndime trupore nga goditjet me mjet të fortë.
Ata ishin dërguar në Qendrën Klinike Universitare të Kosovës për t’u trajtuar.
Njëri nga ta është liruar sot nga spitali.
Lajmin e kanë konfirmuar nga zyra për media e Shërbimit Spitalor Klinik Universitar të Kosovës.
“Zyra për informim e SHSKUK, ju informon se njëri është lëshuar në shtëpi pas tretmanit që ka marrë, kurse tjetri po vazhdon trajtimin në Klinikën e Ortopedisë”, thuhet në përgjigje, për Kallxo.com.
Në rast janë përfshirë ish-nënkryetari i Komunës së Skenderajt, Nuredin Lushtaku dhe tre familjarë të tij.
E të hënën ish-nënkryetarit të komunës së Skenderajt, Nuredin Lushtakut, i dyshuar për përfshirjen në incidentin ku u plagosën dy policë, i është caktuar masa e paraburgimit prej 30 ditësh.
Gjykata Themelore në Mitrovicë, u ka caktuar paraburgim edhe dy familjarë të tjerë të Lushtakut, F.L., dhe A.L.
Të dy po dyshohen për sulm ndaj personit zyrtar, përdorim të armës dhe mbajtje në pronësi të armës pa leje.
Lajmin e ka bërë të ditur avokati i Lushtakut, Artan Çerkini.
Ai ka thënë para mediave se si avokat mbrojtës do të ankohet në Gjykatën e Apelit. “Klienti im tri herë është paraqitur vullnetarisht në polici, nuk ka pasur nevojë për këtë masë”, është shprehur Çerkini.