Nenad Arsiq, i akuzuar për krime lufte në Kosovë, është dënuar sot me 6 vjet burgim.
Vendimi është marrë nga Gjykata Themelore në Prishtinë, njoftoi “RadioKim”.
Arsiq, nga Çagllavica, është arrestuar në pikë-kalimin kufitar në Merdar më 22 tetor 2019 dhe që nga atëherë mbahet në paraburgim. Njëjtë do të mbetet derisa të bëhet i plotëfuqishëm dënimi.
Avokati i tij, Dejan Vasiq, ka paralajmëruar ankesë në shkallën e dytë.
“Kur të marrim aktgjykimin, do të shtroj ankesë në Gjykatën e Apelit dhe shpresoj që me më shumë ndërgjegje do të shqyrtojë lëndën dhe të lirojë Nenadin nga përgjegjësia”, ka thënë Vasiq për mediat serbe.
Arsiq, sipas aktakuzës, më 1999 kishte kryer krime lufte ndaj civilëve shqiptarë në lagjen Emshir në Prishtinë. Në aktakuzë thuhet se Arsiqi në cilësinë e përbërjes rezervë të policisë serbe ka shkelur rëndë të drejtën humanitare ndaj shqiptarëve të Kosovës, duke u futur në shtëpinë e një familjeje dhe duke i shtyrë të pinë raki e të këndojnë këngë patriotike serbe.
