Deputeti gjerman, Knut Abraham, i ka bërë thirrje Komitetit të Ministrave të shteteve anëtarë të Këshillit të Evropës që Kosova të jetë rend dite në agjendën e takimit që do të mbahet në fund të kësaj jave.
Abraham ka thënë të hënën, se është momenti që në mbledhjen e së premtes në Torino të Italisë, të diskutohet për kërkesën e Kosovës për anëtarësim në KE.
“Koha për të vepruar. I bëj thirrje qeverisë italiane që tani ta vendosë në rend dite kërkesën e Kosovës, në mënyrë që të diskutohet në Komitetin e Ministrave të Këshillit të Evropës në Torino të premten. Momenti i duhur duhet të përdoret tani”, ka shkruar Abraham në Tëitter.
Të enjten, kryediplomatja kosovare, Donika Gërvalla, ka dorëzuar aplikimin e Kosovës për anëtarësim në Këshill të Evropës.
“Sapo dolëm nga takimi me zëvendës sekretarin e përgjithshëm të KE dhe në emër të Kosovës propozuam kërkesën për anëtarësimin në Këshillin e Evropës. Sot hapet një kapitull i ri për Kosovën në Këshillin e Evropës. Sot fillon procedura e shqyrtimit të kërkesës sonë e cila do të kalojë nëpër instanca të ndryshme të Këshillit të Evropës, asamblesë parlamentare dhe në fund edhe të Këshillit Ministror”, tha të enjten Gërvalla.