Kryeministri Hoti ka zhvilluar takim virtual me Peter Beyer, raportuesin për Kosovën në Asamblenë Parlamentare të Këshillit të Evropës.Në këtë takim u diskutuan situata me pandeminë, masat e qeverisë, çështja e presidentit e deialogu me Serbinë, përcjellë Gazeta Blic.Hoti në këtë takim tha se nëse nuk do gjendet një zgjidhje për çështjen e presidentit, vendi do shkojë në zgjedhje.
Ai i tha Beyerit se deklaratat kërcënuese nga zyrtarët e lartë të Serbisë nuk po e ndihmojnë procesin e dialogut.
Kjo është komunikata e plotë për media:Kryeministri i Republikës së Kosovës, z. Avdullah Hoti zhvilloi një takim virtual me raportuesin për Kosovën në Asamblenë Parlamentare të Këshillit të Evropës, z. Peter Beyer, me të cilin bisedoi për gjendjen e pakicave, lirinë e medias dhe zhvillimet aktuale në vend, tema këto që do të jenë pjesë e raportit ‘’Situata në Kosovë’’.
Temë e pashmangshme ishte edhe situata aktuale në vend, sfidat që ka shkaktuar pandemia Covid-19 dhe masat të cilat i ka marrë qeveria deri më tani për të menaxhuar sa më mirë situatën.Kryeministri Hoti ngriti edhe çështjen e Presidentit, ku theksoi gatishmërinë e subjekteve politike për të arritur një zgjidhje, ndërkohë që nënvizoi se nëse nuk do të ketë zgjidhje për këtë çështje vendi duhet të shkoj në zgjedhje.
Në këtë takim u bisedua edhe për procesin e dialogut Kosovës-Serbi i cili aktualisht po zhvillohet në nivel të ekspertëve. Me këtë rast Kryeministri Hoti theksoi se deklaratat kërcënuese nga zyrtarë të lartë të Serbisë nuk e ndihmojnë këtë proces.
