Valtida Shukriu, mbesa e Muhamed Shukriut dhe pasardhëse e drejtpërdrejtë e familjes Boletini, ka thënë se gjetja, nxjerrja dhe realizimi i aksionit për kthimin e eshtrave të heroit kombëtar Isa Boletini është meritë e dokumentuar historikisht e gjyshit të saj.
Në një deklaratë publike, Shukriu ka theksuar se gjyshja e saj Sahadete Boletini Gora është vajza e Musa Boletinit, djalit të gjashtë të Isa Boletinit, duke shtuar se kjo lidhje familjare i jep përgjegjësi morale dhe historike për të reaguar ndaj, siç u shpreh ajo, përpjekjeve për shtrembërim dhe manipulim të së vërtetës historike.
Ajo ka thënë se roli i Muhamed Shukriut në këtë proces është fakt i dëshmuar nga bashkëpunëtorë të drejtpërdrejtë dhe i njohur nga institucionet e kohës, duke kujtuar se për kontributin e tij jetësor dhe patriotik ai është nderuar me mirënjohje zyrtare nga presidenti i Republikës së Kosovës, dr. Ibrahim Rugova.
Sipas saj, bashkëpunëtorët kryesorë në këtë proces kanë qenë akademikët Ali Hadri dhe Pajazit Nushi, profesori Latif Berisha, presidenti Ibrahim Rugova, si dhe Mulla Asllan Murati dhe Mulla Idrizi Demiri, imam i Podgoricës, të cilët, siç ka thënë ajo, kanë dhënë kontribut konkret dhe të pakontestueshëm.
Shukriu ka deklaruar se kjo ngjarje historike është dokumentuar profesionalisht në dokumentarin e Klan Kosovës, prodhim i Zija Miftarit dhe Fatos Zogajt, si dhe në dokumentimet e gazetarit Marin Mema, të cilat sipas saj janë burime publike dhe të verifikueshme.
Ajo ka shtuar gjithashtu se Gazmend Boletini, i vetmi pasardhës në vijën mashkullore të familjes Boletini, po prezanton publikisht të vërtetën historike të kësaj ngjarjeje në përputhje me faktet dhe dëshmitë reale.
Në fund, mbesa e Muhamed Shukriut ka paralajmëruar se çdo person apo entitet që tenton të manipulojë apo të shtrembërojë këtë ngjarje historike do të ndiqet sipas ligjit, duke theksuar se historia e Isa Boletinit është trashëgimi kombëtare dhe nuk është pronë për manipulim.