Presidentja e Kosovës, Vjosa Osmani, ka thënë se përfshirjen e Kosovës në themelimin e Bordit të Paqes, do ta dërgojë për ratifikim në Kuvendin e Kosovës, në përputhje me kushtetutën e vendit.
Ajo deklaroi se anëtarësimi në organizata ndërkombëtare të paqes që udhëhiqen nga Shtetet e Bashkuara të Amerikës është në interesin më të lartë të Kosovës.
“Anëtarësimi në organizata ndërkombëtare të paqes e që udhëhiqen nga aleati ynë strategjik, fuqizon sovranitetin tonë, pozicionin tonë ndërkombëtar, si dhe është në interesin më të lartë të Republikës së Kosovës. Prandaj, kjo marrëveshje historike do t’i dërgohet Kuvendit të Kosovës për ratifikim, në përputhje me kushtetutën e Kosovës, për të marrë miratimin final të përfaqësuesve të popullit”, ka thënë Osmani në një postim në Facebook.
Osmani falënderoi presidentin Trump për ftesën që ta përfaqësojë Republikën e Kosovës në këtë moment historik, sipas saj.
“Kosova do të jetë në shërbim te paqes, sot e përherë!” – shtoi Osmani.