Kryesia e Bashkësisë Islame të Kosovës, përkatësisht Drejtoria për Haxh dhe Umre, ka bërë të ditur datat zyrtare të nisjes së besimtarëve myslimanë nga Kosova për të kryer haxhin në Mekë, për vitin 2025.
Sipas njoftimit, udhëtimi i besimtarëve drejt vendeve të shenjta do të realizohet – me lejen e Zotit – në datat 24, 25, 26 dhe 27 maj 2025, përmes linjës ajrore Turkish Airlines.
Kthimi i tyre në Kosovë parashihet të bëhet në datat 16, 17 dhe 18 qershor 2025.
Bashkësia Islame e Kosovës ka shprehur lutjen që ky udhëtim i shenjtë të jetë i lehtë dhe i pranuar për të gjithë besimtarët pjesëmarrës:
“Lusim Zotin e Madhëruar që besimtarëve tanë t’ua lehtësojë dhe t’ua pranojë shkuarjen në haxh.”
Ky njoftim vjen si pjesë e përgatitjeve të rregullta për organizimin e njërës nga ngjarjet më të rëndësishme në jetën shpirtërore të besimtarëve myslimanë.