Në gjykimin ndaj të akuzuarve Mendim Sojeva dhe Ganimete Gashi-Ahmeti, kryesuesi i grupit të ekspertëve, Medain Hashani, tha se gjatë përpilimit të super-ekspertizës nuk kanë mundur të konstatojnë përgjegjësi individuale lidhur me shkeljet që pretendohen si në aktakuzë.
“S’kemi pas mundësi me konstatu se ka pas veç një përgjegjës”, tha Hashani duke u përgjigjur në pyetjet e prokurorit special, Naim Abazi, raporton “Betimi për Drejtësi”.
Në këtë rast, zyrtari i Agjencisë së Kosovës për Produkte dhe Pajisje Medicinale (AKPPM), Mendim Sojeva dhe zyrtarja e Ministrisë së Shëndetësisë (MSH), Ganimete Gashi-Ahmeti, po akuzohen se kishin përvetësuar mbi 1 milion euro në emër të avancave.Hashani tha se për grupin e ekspertëve ka qenë e pakuptimtë se si një person i vetëm të ketë mundur të falsifikojë kaq shumë dokumente, e që është dashur të jenë mbi 14 mijë nënshkrime. Shtoi se një gjë e tillë është e pamundur.
Gjithashtu, Hashani tha se Ministria e Shëndetësisë edhe përkundër urdhëresës së Gjykatës, ka refuzuar të bashkëpunojë në ofrimin e dokumenteve përkatëse për përpilimin e super-ekspertizës. Kështu, ai tha se kanë pasur mungesë të disa dokumenteve.
“Çka mundem me potencu është se i vetmi institucion i cili nuk ka pranu bashkëpunim gjatë procesit të ekspertizës është Ministria e Shëndetësisë, e cila nuk na ka ofru asnjë dokument dhe s’na kanë pranu as në takim edhe përkundër vendimit të dorëzuar nga ana e gjykatës”, tha Hashani.
I pyetur se a janë analizuar dëshmitë e dëshmitarëve që kanë deklaruar lidhur me këtë çështje penale, eksperti tha se çdo shkronjë e vendosur në ekspertizë është analizuar dhe vlerësuar.
Hashani tha se super-ekspertiza në këtë rast është bërë për shkak të kontradiktave që kishin ekspertizat e mëparshme.Ai shtoi se kanë pasur dokumentacion të mjaftueshëm, por kanë pasur nevojë edhe për dokumentacion shtesë, për çka ka qenë i njoftuar edhe kryetari i trupit gjykues, gjykatësi Vesel Ismaili.
Eksperti tha se në super-ekspertizë kanë ardhur në përfundimin se në 687 raste nuk janë lëshuar dokumentacione përkatëse dhe se ruajtjen e dokumenteve për çdo deponim, avancë të parave ka qenë e detyruar ta bëjë MSH-ja, AKPPM-ja dhe vetë Thesari i Shtetit.
Më pas, seanca u ndërpre me propozimin e prokurorit Abazi, i cili tha se pas konsultimit me prokuroren e rastit Habibe Salihu, do të shohin mundësinë të propozojnë apo jo prova të reja materiale, për çka me e-mail do të njoftojnë gjykatën dhe palët në procedurë.
Seancat e radhës pritet të vazhdojnë me administrim të provave materiale, mbrojtjen e të akuzuarve, si dhe fjalën përfundimtare.
Seanca e fundit lidhur me këtë rasti është mbajtur më 21 maj 2024, në të cilën ishte aprovuar propozimi i PSRK-së që të caktohet ekspertizë e re financiare. Për shkak të kësaj periudhe të kaluar nga seanca e fundit, gjykimi filloi rishtazi dhe me pëlqimin e palëve në procedurë u konsideruan të lexuara të gjitha veprimet e ndërmarra paraprakisht.
Ndryshe, sipas aktakuzës së përpiluar më 6 tetor 2020, i akuzuari Mendim Sojeva po akuzohet se në cilësinë e udhëheqësit të divizionit për buxhet dhe financa në AKPPM, në periudhën prej vitit 2014 e deri në mars 2018, kishte përvetësuar paratë e tërhequra në emër të avancave për udhëtime zyrtare të zyrtarëve të AKPPM-së.
Sipas PSRK-së, këto avanca i ishin besuar të akuzuarit Sojeva në menaxhim sipas pozitës së tij, ku shumën e përgjithshme prej 1 milion e 355 mijë e 441 euro e 14 centë, të tërhequra nga zyrtari i Ministrisë së Shëndetësisë (MSh), Fatmir Kajtazi, e kishte pranuar i akuzuari Sojeva, duke nënshkruar në fletë-tërheqje me rastin e pranimit për shumën 1 milion e 221 mijë e 501 euro e 14 centë, por për të cilat nuk ka dëshmi se ishin respektuar procedurat për tërheqje.
Në aktakuzë përmenden shuma të ndryshme të parave. Për disa prej tyre, thuhet se ekziston dokumentacion i kompletuar, ndërsa për disa të tjera jo, ku vetëm në vitin 2017, sipas prokurorisë, në emër të 40 zyrtarëve të AKPPM-së, ishin tërhequr 290 mijë e 430 euro, të cilët zyrtarë e kishin mohuar se i kishin pranuar këto shuma dhe se nuk ka dëshmi për pranim nga ana e tyre në emër të MSh-së.
E gjithë kjo shumë e avancave, sipas PSRK-së, ishte zotuar në Sistemin Informativ të Financave të Kosovës (SIMFK) me ID të përdoruesve Shkelzen Sadriu në vlerë 1 milion e 238 mijë e 764 euro, me ID të përdoruesit Naime Shahini-Feta shuma prej 173 mijë e 305 euro, të cilët zyrtarë kishin mohuar se kishin bërë këto shuma të zotimeve, duke dyshuar në të akuzuarin Sojeva, i cili sipas tyre i kishte keqpërdorur fjalëkalimet e tyre.
Po ashtu, në aktakuzë thuhet se regjistrimi i shpenzimeve për avancat në SIMFK ishte bërë me ID të Dhurata Alihajdaraj–Veseli, shuma prej 553 mijë e 269 euro, me ID të Thesarit, Ibadete Shala shuma prej 156 mijë e 750 euro dhe Bali Morina shuma prej 20 mijë e 850 euro, të cilët kishin mohuar se kishin bërë regjistrim të shpenzimeve të avancave duke e akuzuar të akuzuarin për keqpërdorim të fjalëkalimeve të tyre.
Sipas aktakuzës, aprovimi i tërheqjes ishte bërë nga zyrtari kryesor financiar në MSh, Musa Rexhaj dhe ushtruesi i detyrës së zyrtarit kryesor financiar Hajzer Dobra, kurse nga e gjithë shuma e tërhequr, të përdoruesit të të akuzuarit Sojeva ishin certifikuar 779 mijë e 289 euro, për të cilat në AKPPM, nuk ekziston dokumentacion për arsyetimin e tyre.
Nga shuma prej 1 milion e 355 mijë e 441 euro e 14 centë, të tërhequra në emër të avancave, për 133 mijë e 940 euro, ekziston dokumentacion i kompletuar dhe gjysmë i kompletuar, kurse për avancat e tërhequra në vlerë prej 1 milion e 221 mijë e 501 euro e 14 centë, përveç fletëtërheqjeve të siguruara nga AKPPM dhe NLB, e të nënshkruara nga i akuzuari se i kishte pranuar, në AKPPM nuk ekziston asnjë dokumentacion se ato avanca ishin miratuar apo aprovuar nga menaxhmenti apo se cili zyrtar i kishte pranuar.
Kjo shumë e paarsyetuar si dëshmi, sipas PSRK-së ishte përvetësuar nga i akuzuari Sojeva, i cili i kishte pranuar ato para, duke i shkaktuar dëm buxhetit të AKPPM-së – Republikës së Kosovës.
Po ashtu, sipas PSRK-së, Sojeva në cilësinë e zyrtarit certifikues për qasje në SIMFK dhe Ganimete Gashi-Ahmeti si zyrtare shpenzuese për qasje në këtë sistem, nga 7 shkurti e deri më 12 shkurt 2018, përmes ueb-shfletuesit “Internet Explorer”, kishin hyrë në këtë sistem me fjalëkalim të personave zyrtarë të Ministrisë së Financave, kishin mbyllur avancat duke bërë regjistrimet si shpenzim dhe certifikim të avancave për udhëtime zyrtare të tërhequra nga banka të emër të zyrtarëve të AKPPM-së me user të Bali Morinës.
Kështu, të njëjtit pretendohet se kishin regjistruar kuponë shpenzimi në vlerë 20 mijë e 850 euro, ndërsa në emër të Ibadete Shalës kishin regjistruar si shpenzim i avancave për udhëtime zyrtare 72 skuponë në vlerë 154 mijë e 736 euro e 84 centë, në shumë të përgjithshme 175 mijë e 586 euro e 84 centë, me user të të akuzuarit Sojeva, duke u munduar të arsyetojnë këtë shumë të avancave të tërhequra nga Banka NLB, në emër të zyrtarëve të AKPPM-së.
Për këto veprime, Sojeva po ngarkohet me veprat penale “Përvetësimi në detyrë”, dhe në bashkëkryerje me të akuzuarën Ganimete Gashi–Ahmeti edhe për veprën penale “Hyrje në sistemet kompjuterike”.