Kryetari i Komunës së Prizrenit, Shaqir Totaj, zhvilloi sot takimin e parë për këtë vit me drejtorët e drejtorive të ndryshme, pas një viti të suksesshëm. Gjatë këtij takimi, ai theksoi se Komuna e Prizrenit ka arritur të realizojë 96.81% të buxhetit të përgjithshëm për vitin 2024, duke siguruar financime për projekte të rëndësishme në shërbim të interesit publik.
Kryetari Totaj theksoi se ky rezultat është një dëshmi e angazhimit të vazhdueshëm të administratës komunale për përmirësimin e kushteve të jetesës për qytetarët e Prizrenit. Po ashtu, ai shprehu besimin se viti 2025 do të jetë edhe më i suksesshëm, me fokus të shtuar në përmirësimin e cilësisë së jetës së qytetarëve.
“Viti që sapo kemi filluar do të jetë edhe më i mirë se viti i kaluar, gjithmonë me prioritet ngritjen e cilësisë së jetës së bashkëqytetarëve tanë,” tha Kryetari Totaj, duke shprehur optimizëm dhe angazhim për realizimin e projekteve të reja dhe përmirësimin e shërbimeve për qytetarët e Komunës së Prizrenit.