Bota e boksit do të presë me padurim datën 27 prill 2024, kur Armend Xhoxhaj takohet me Hüseyin Cinkara në Nuernberg në një meç eliminator për titullin e botës në versionin IBF për peshën kruzer.
Xhoxhaj do të takohet me turkun me shtetësi gjermane, Huseyin Cinkara, ndërsa në meçet tjera do të boksojë edhe Ardian Krasniqi.
Ish boksieri i njohur, Jurgen Brahmer është ai që do të organizojë këto meçe, ku planifikohet tetë apo nëntë të tilla. Brahmer është edhe trajner i Armend Xhoxhaj. Prizrenasi Xhoxhaj në boksin profesionist ka 18 fitore e tri humbje, ndërsa Huseyin Cinkara i ka 21 fitore nga po aq meçe, prej tyre 17 me nokaut.
“Rasti për t’u bërë numër një në versionin IBF është motivim i madh. Huseyin Cinkara është një boksier me përvojë, që është shumë më gjatë në boks profesionist sesa unë. Duhet të boksoj me mençuri dhe dua të fitoj”, kishte thënë Xhoxhaj pasi u caktua meçi.
Po ashtu në këtë mbrëmje pritet të boksojnë edhe Nelson Hysa dhe Labinot Xhoxhaj.
