Serbia nuk do të ndryshojë qëndrim ndaj Kosovës e as s’do të vendos sanksione ndaj Federatës Ruse, ka thënë kryediplomati serb, Ivica Daçiq.
Marrëdhëniet ndërmjet ShBA-së dhe Serbisë janë në ngritje, i tha Daçiq televizionit publik të Vojvodinës, por se dallojnë rreth çështjes me Kosovën.
“Njohje të Kosovës dhe as sanksione ndaj Rusisë nuk do të ketë”, tha ministri serb i Jashtëm.
Në lidhje me anëtarësimin e Kosovës në Këshill të Evropës, Daçiq tha se “thelbësisht ekzistojnë kushtet” ndonëse u shpreh se “i kanë shumicën e votave”.
Ai tha se nëse shtetet njohëse të Kosovës “e shohin si të domosdoshme anëtarësimin e saj në KiE” atëherë as Serbia “nuk ka se si ta parandalojë atë”, përcjell Insajderi.
“Nuk mund ta parandalojmë anëtarësimin e Kosovës në KiE nëse kanë shumicën e votave. Çështja është se a duan”, tha ai, derisa tha se nëse futet në agjendë votimi për anëtarësim të Kosovës, Serbia nuk do të merr pjesë.
Pyetur rreth deklaratës së zv/ndihmës sekretarit amerikan të shtetit, Gabriel Escobar, se Serbia “një ditë do të zgjohet dhe të shohë se Kosova është e pavarur”, Daçiç tha se “mos të flasim se kush do të jetë më i befasuar”.
“Ata do ta kuptojnë se Kosova nuk është e pavarur”, tha Daçiq, derisa shtoi edhe se Beogradit vështirë se dikush do t’ia ndërrojë qëndrimin në këtë çështje.
“Jemi të gatshëm për kompromise dhe plane”, tha ai, derisa shtoi se Sebria “ka vija të kuqe” për këtë çështje.