Nëntë pjesëtarë të Policisë së Kosovës janë tërhequr nga Jarinja për shkak të problemeve shëndetësore që kanë.
Transportin e policëve e ka kryer KFOR-i.
Burime të KALLXO.com kanë bërë të ditur se policët të cilët janë larguar kanë probleme akute shëndetësore, si sëmundje të zemrës.
Sot është dita e 11-të që nga vendosja e barrikadave në rrugët në veri të Kosovës.
Situata në veri të Kosovës është e tensionuar që nga 10 dhjetori.
Atë ditë, grupe qytetarësh serbë janë mbledhur në qytetet në veri të vendit për të protestuar kundër arrestimit të Dejan Pantiqit, ish-polic i Kosovës, i akuzuar nga autoritetet e Kosovës për organizim të sulmeve kundër zyrtarëve të KQZ-së dhe të Policisë së Kosovës.
Grupet e serbëve, pjesë e të cilëve janë edhe persona me maska e madje edhe me armë, kanë bllokuar rrugët kryesore drejt pikave kufitare Jarinjë dhe Bërnjak.
Për çështje sigurie, Policia e Kosovës ka mbyllur për qarkullim këto dy pika kufitare.