Rreth 31 persona kanë mbetur të lënduar si pasojë e shpërthimit të një bombole të gazit që ka ndodhur sot në Ferizaj.
Aktualisht, një numër i caktuar i të plagosurve po trajtohen në Spitalin e Ferizajt, teksa nëntë prej tyre janë transportuar për në QKUK.
Nga QKUK i kanë thënë lajmi.net se të lënduarit janë në sallën operative për trajtimin e plagëve.
E për momentin e shpërthimit janë rrëfyer edhe disa nga dëshmitarët.
“Kemi menduar se ishte tërmet. Është dashtë me i nxjerr njerëzit nga aty”, ka thënë njëri nga personat që gjendej brenda lokalit ku ndodhi shpërthimi, e i cili po ashtu ka pësuar lëndime.
Mediat lokale në Ferizaj kanë publikuar pamje nga Spitali atje, ku shihet puna intensive e personelit mjekësor për trajtimin e të lënduarve.
Shpërthimi në Ferizaj ishte aq i fuqishëm, sa që në pamjet e publikuara është vërejtur se janë thyer edhe xhamat e banesave që gjenden afër vendit ku ka ndodhur shpërthimi.