Përfundoi rinumërimi i votave për presidentin dhe nënkryetarët e Republikës Srpska pas së cilës u konstatua se kandidati i SNSD-së, Milorad Dodik ka marrë shumicën e votave.
Raporti për rinumërimin e votave është miratuar në seancën e sotme të 73-të të Komisionit Qendror të Zgjedhjeve të Bosnjë-Hercegovinës, por jo njëzëri.
Anëtarja e Komisionit Qendror të Zgjedhjeve, Vanja Bjelica Prutina, tha se rezultatet për presidentin e Republikës Srpska kanë konfirmuar se Milorad Dodik është president i ri i Republikës Serbe.
Bjelica Prutina ka thënë se qëllimi i saj kur ka mbështetur vendimin për rinumërimin e votave ka qenë që të përcaktojë me saktësi rezultatet, raporton klix.ba.
“Unë mendoj se nuk ka absolutisht asnjë dilemë kur është fjala për presidentin e Republikës Srpska. Pra, në këtë kuptim është përcaktuar rezultati dhe sipas këtyre rezultateve të përcaktuara është Milorad Dodik,” tha ajo.
Anëtari i KQZ-së Vlado Rogiq tha se nuk kanë kohë për të përsëritur zgjedhjet, as mjete dhe se nuk është e mundur të përsëriten zgjedhjet për shkak të disa parregullsive të vogla.
Opozita nga Republika Srpska kërkoi rinumërim të votave për shkak të dyshimeve për mashtrime zgjedhore dhe besimit se kandidatja e tyre Jelena Triviq ishte fituese e zgjedhjeve.