Dhuna ndaj nxënësve të shkollave fillore e të mesme nga mësimdhënësit, ende është një dukuri shqetësuese. Mësues, arsimtarë e profesorë në të gjithë vendin marrin guximin që ndaj fëmijëve të ushtrojnë dhunë psikike e fizike, për çka edhe shpesh përballen me ligjin, raporton Gazeta Sinjali.
Një arsimtar i shkollës fillore ’28 Nëntori’ në fshatin Brodosanë të komunës së Dragashit, dyshohet se ka sulmuar fizikisht një nxënëse të klasë së tetë.
Burimet e Gazetës Sinjali kanë bërë me dije se vajza e mitur ka kërkuar ndihmë mjekësore në spital, për shkak të lëndimeve që kishte marrë në hundë nga goditja me shkop. Për shkak të natyrës së lëndimeve, nxënësja është udhëzuar që të transferohet në Spitalin Rajonal të Prizrenit për trajtim të mëtutjeshëm mjekësor.
Ndërkohë rasti është denoncuar edhe në Polici, të cilët janë vënë në lëvizje për të arrestuar personin e dyshuar, mirëpo i njëjti nuk është gjetur ende.
Me urdhër të prokurorit, rasti është iniciuar ‘Lëndim trupor’, ndërsa veprimet tjera ligjore do merren posa të kapet i dyshuari.