Një tjetër përplasje midis pushtetit dhe opozitës u shënua të martën, në mbledhjen e Komisionit për Mbikëqyrjen e Financave Publike, që në rend dite kishte pasqyrat financiare të Telekomit për vitin 2021.
Shkak i kësaj përplasjeje u bë procesverbali i mbledhjes së kaluar, raportoi EO-ja.
Deputetët e Partisë Demokratike të Kosovës, Hajdar Beqa dhe Rashit Qalaj, kanë lëshuar mbledhjen pas mospajtimeve me deputeten e Lëvizjes Vetëvendosje, Mirlinda Sadiku.
Beqaj ka kërkuar nga deputetja Sadiku që të kërkojë falje për, siç tha ai, mashtrimin e qytetarëve me kauza të rrejshme.
“Unë kam thënë për mënyrën e qeverisjes në Kosovë. Këto ide teorike iu kisha lut t’i hiqeni, iu kisha lut të jeni seriozë dhe të mos flisni për deputetë. Falje kërkoni qytetarëve që i keni mashtruar me kauza të rrejshme”, ka thënë ai.
Deputetja e VV-së, tha se vetë PDK-ja ka përdorur në Kuvend gjuhë joparlamentare.
“Ne mund të kemi pikëpamje të ndryshme poetike ju e përsëritët prapë një gabim. Në mes të parlamentit keni thënë ‘ta heqë kokën’. U jeni referuar deputetëve të LVV-së. Gjuha juaj ka qenë joparlamentare”, ka thënë ajo.