82% është mbulueshmëria me vaksinën kundër fruthit në Kosovë, IKShPK thirrje prindërve për vaksinim të fëmijëve

Ndërkaq mbulueshmëria për dozën e dytë të kësaj vaksine e cila jepet tek fëmijët e moshës 5–6 vjeç është 94%.

Më 06.05.2026, drejtoresha e Klinikës Infektive në QKUK, Vera Berisha Ndrejaj tha se një nga tetë rastet të prekura me fruth në Kosovë është duke u trajtuar në mjekim intensiv për shkak të komplikimeve të rënda.

Instituti Kombëtar i Shëndetësisë Publike (IKShPK) kishte njoftuar se të gjitha rastet e konfirmuara me fruth janë fëmijë të pavaksinuar me vaksinën MMR (kundër fruthit, shytave dhe rubellës).

Nga ky institucion u kanë bë thirrje prindërve që t’i vaksinojnë fëmijët e tyre me vaksinën MMR menjëherë pas mbushjes së vitit të parë të jetës.

IKShPK ka theksuar se prindërit që për arsye të ndryshme nuk kanë arritur t’i vaksinojnë fëmijët me kohë siç parashihet në kalendarin e rregullt të vaksinimit, të paraqiten sa më parë në qendrën më të afërt të vaksinimit për të siguruar mbrojtjen e fëmijëve të tyre dhe për të parandaluar përhapjen e sëmundjes.

Fruthi është sëmundje virale shumë ngjitëse dhe e rëndë, që shkaktohet nga një virus i familjes Paramyxoviridae. Përhapet kryesisht përmes ajrit dhe spërklave dhe përmes kontaktit të drejtpërdrejtë.

Virusi infekton traktin respirator dhe pastaj përhapet në organizëm.Shenja e parë e fruthit zakonisht është temperatura e lartë trupore, që zakonisht fillon rreth 10 deri më 12 ditë pas ekspozimit ndaj virusit dhe zgjat nga 4 deri më 7 ditë.

Shenja të tjera të sëmundjes janë rrjedhje nga hunda, kolla, sytë e skuqur e të përlotur dhe pika të vogla e të bardha në mukozën që e mbështjell zgavrën e gojës. Pas disa ditësh paraqiten puçrrat, kryesisht në fytyrë dhe në pjesën e qafës.