Mediumi prestigjioz National Geographic, ka publikuar së fundmi një artikull ku promovon Parkun Kombëtar Sharri dhe shtegun e ecjeve të gjata High Scardus Trail, duke e përshkruar këtë të fundit si një destinacion të ri, i sapo lansuar për turistët e aventurës dhe natyrës nga e mbarë Bota. High Scardus ka vite që po krijohet, por shkruajnë se ideja u konceptua në vitin 2016. ”Fazat janë hartuar, shënjuesit janë pikturuar, shtëpizat janë restauruar dhe shtëpitë janë kthyer në bujtina.” shkruhet në artikull duke treguar se tani ky destinacion është mjaftueshëm i gatshëm për alpinistët.
Ata shkruajnë se duke kaluar nëpër disa nga malet më pak të vizituara në Evropë, shtegu kalon nëpër gjashtë parqe kombëtare – dy në Maqedoninë e Veriut, një në Kosovë dhe tre në Shqipëri. ”Shtegu i Lartë Scardus prej 225 miljesh gjurmon kufijtë e Kosovës, Shqipërisë dhe Maqedonisë së Veriut deri në një nga liqenet më të thellë dhe më të vjetër në kontinent.” shkruajnë nga National Geographic. Ndërkaq, theksohet se koha më e mirë për të shkuar është mesi i qershorit deri në mes të tetorit. Përndryshe, fushat e borës mund të bllokojnë hyrjen, përveç në fazat me lartësi më të ulët gjatë fillimit të qershorit.
