Kryeministri i Republikës së Kosovës, Albin Kurti, u takua të mërkurën me ambasadorë, përfaqësues diplomatikë dhe të organizatave ndërkombëtare në Kosovë për të diskutuar zbatimin e koordinimin rreth Fondit të sapokrijuar të Përbashkët Përshpejtues të Objektivave të Zhvillimit të Qëndrueshëm (SDG) për Kosovën.
Krijimi i Fondit Përshpejtues të OZhQ-ve u zyrtarizua në takimin e djeshëm ndërmjet zëvendëskryeministrit të Parë për Integrim Evropian, Zhvillim dhe Dialog të Republikës së Kosovës, Besnik Bislimi, dhe koordinatores rezident të Kombeve të Bashkuara në Kosovë, Arnhild Spence.
Në njoftim bëhet e ditur se kryeministri Kurti theksoi gjatë këtij shkëmbimi që ky fond ka për qëllim avancimin e objektivave të zhvillimit të qëndrueshëm në përputhje me Agjendën 2030. Ai shtoi se ideja e iniciativës fokusohet në krijimin e një fondi që do të shërbente si një bazë për iniciativat që “nuk lënë askënd pas”, duke siguruar qeverisje të mirë dhe vendimmarrje në nivelin më të lartë të qeverisë. Sipas njoftimit, kryeministri gjithashtu ka mirëpritur idenë e centralizimit të kontributeve të donatorëve drejt objektivave të OZhQ-ve, duke e konsideruar atë si një shtesë të vlefshme ndaj mbështetjes aktuale nga partnerët ndërkombëtarë.
