Deputetja, Drita Millaku, e cila ishte nga radhët e Lëvizjes Vetëvendosje, sot iu bashkua Lidhjes Demokratike të Kosovës. Lajmin e ka bërë të ditur kryetari i LDK-së, Lumir Abdixhiku.
“Drita Millaku, mirë se vjen! Deputetja e Kuvendit të Kosovës, Drita Millaku, nga sot është pjesë e Lidhjes Demokratike të Kosovës. Ajo i bashkohet familjes sonë politike në rrugëtimin e përbashkët që na pret përpara. Ky vendim i saj për të qenë pjesë e radhëve tona është jo vetëm një dëshmi e përkushtimit të saj politik, por gjithashtu një tregues i qartë se vizioni dhe programi i LDK-së për Republikën, është i duhuri sot”, shkruan ai.
Abdixhiku thekson se si një figurë e respektuar në Prizren dhe një deputete e mandatuar për dy herë, ajo vjen si aset i rëndësishëm partiak dhe si kuadër për programin tonë politik dhe të ardhmen e vendit tonë.
“Si një figurë e respektuar në Prizren dhe një deputete e mandatuar për dy herë, ajo na vjen si aset i rëndësishëm partiak, dhe si kuadër për programin tonë politik dhe të ardhmen e vendit tonë. Me Dritën kemi diskutuar gjatë për vizionin tonë të përbashkët për Republikën; për arsimin në veçanti, për programin tonë politik dhe të ardhmen e vendit tonë.”, ka thënë Abdixhiku.
Në njoftim, Abdixhiku, është shprehur se përkushtimi i Millakut në fushën e arsimit dhe besimi i saj në potencialin e Kosovës janë motive që e bëjnë atë të rëndësishme në ndërtimin e një rrugëtimi të përbashkët si një mënyrë për të realizuar ndryshime të qëndrueshme.
“Drita ka një pasion për librin, por edhe për të krijuar mundësi për të rinjtë dhe gratë në Kosovë. Ajo e kupton rëndësinë e bashkëpunimit dhe e sheh ndërtimin e një rrugëtimi të përbashkët si një mënyrë për të realizuar ndryshime të qëndrueshme, ato që sot LDK po i ofron. Besimi i saj në potencialin e Kosovës, së bashku me përkushtimin e saj për arsim janë motive që e bëjnë Dritën tejet të rëndësishme në këtë proces”, shkruan kryetari i LDK-së.
Tutje, Abdixhiku ka dhënë një biografi të shkurtër të Millakut.
“Drita Millaku shkollimin fillor dhe të mesëm e kreu në Prizren. Fakultetin Filologjik, Dega: “Gjuhë dhe Letërsi Shqipe” e kreu në Universitetin e Prishtinës ku edhe mori titullin, “Magjistër e Shkencave Filologjike”. Për një dekadë rresht punoi në bibliotekën e qytetit të Prizrenit. Në vitin 2013 ajo është zgjedhur asambliste në Kuvendin Komunal të Prizrenit. Në vitin 2017, 2021, fitoi mandatin e deputetes si grua më e votuar në Prizren. Drita Millaku është e martuar me Fisnik Millakun dhe ka dy djem Longarin dhe Lumin.”, shkruan në fund të njoftimit kreu i LDK-së, Lumir Abdixhiku./TVPrizreni/
