Presidenti i Shqipërisë, Ilir Meta, ka thënë se duhet marrë shembull ushtrimi i demokracisë në Kosovë, duke vënë theksin te zgjedhjet e lira dhe të ndershme.

Meta u takua me kryeparlamentarin Glauk Konjufca të shtunën në Prishtinë.

“Kosova ka hedhur themele të forta e të qëndrueshme të shtetndërtimit, duke përqafuar vlerat dhe parimet më të larta demokratike, respektin për liritë, të drejtat dhe dinjitetin njerëzor, mbrojtjen më sipërore të pakicave, e përkushtuar për funksionimin e demokracisë parlamentare, që respekton parimet e kontrollit dhe balancës së pushteteve, që synon sundimin e ligjit dhe luftën kundër korrupsionit. Shqipëria duhet të marrë shembull nga ushtrimi i demokracisë në Kosovë, në veçanti se si llogaridhënia qeverisëse sigurohet përmes institucionit më jetik të demokracisë përfaqësuese, që janë zgjedhjet e lira dhe të ndershme”, ka shkruar Meta në Facebook.

Presidenti i Shqipërisë gjithashtu u shpreh se “liberalizimi i vizave për Kosovën është një domosdoshmëri që duhet të ndodhë sa më parë”.

Meta po qëndron për vizitë në Kosovë për ditën e dytë me radhë. Ai u takua dje me presidenten Vjosa Osmani, kryeministrin Albin Kurti e liderin e PDK-së, Memli Krasniqi.

Kjo do të jetë edhe vizita e fundit e Metës jashtë Shqipërisë si president. /koha.net/