Në vitin 2022, për herë të parë në fshatin Zgatar të Dragashit, ka filluar organizimi i turneut në futboll të vogël nën dritën e reflektorëve me moton “Përmes futbollit afrojmë diasporen”, ndërsa këtë vit kjo ngjarje sportive do të mbahet me moton “Opoja, vendlindja ime”.
Dy vitet e kaluara, ky turne kishte zgjuar interesim të jashtëzakonshëm tek sportdashësit opojanë në një ambient madhështor sportiv, ndërsa pjesë e turneut ishin edhe ekipe të bashkëatdhetarëve si dhe nga komuna e Prizrenit. Turneu u përshkrua me lojëra cilësore dhe në frymën e lartë sportive, pa as më të voglin incident nga ekipet pjesëmarrëse dhe mbarëvajtje për çdo lëvdatë nga organizatorët.
Organizatorët tashmë kanë filluar përgatitjet për organizimin e edicionit të tretë me radhë të këtij turneu, i cili do të mbahet nga datat 2, 3 dhe 4 gusht në orët e mbrëmjes, falë mbështetjes së donatorëve lokal, individëve si dhe bashkëatdhetarëve.
Paraqitja e ekipeve do të bëhet nga data 20-25 korrik, ndërsa hedhja e shortit me datën 27 korrik. Për më të mirët e turneut do të dhurohen të holla, trofe dhe mirënjohje./TVPrizreni/