Presidenti amerikan, Donald Trump, ka deklaruar se mund të mos e zgjasë armëpushimin e përkohshëm midis Shteteve të Bashkuara dhe Iranit, nëse negociatat nuk arrijnë të prodhojnë një marrëveshje deri të mërkurën, duke rritur mundësinë e veprimeve të reja ushtarake.
Delegacionet amerikane dhe iraniane pritet të zhvillojnë një raund të dytë negociatash për paqe të hënën, kanë thënë burime iraniane për CNN.
Ndërkohë, zyrtarët amerikanë nuk e kanë konfirmuar ende se negociatat janë planifikuar, por Trump më herët ka shprehur besim se të dyja palët janë afër një marrëveshjeje.
Në anën tjetër, kryetari i Parlamentit iranian, Mohammad Bagher Ghalibaf, i cili ka kryesuar delegacionin e Iranit në bisedimet e fundit me SHBA-në në Islamabad, ka kritikuar deklaratat e Trumpit.
“Ata nuk e fituan luftën dhe sigurisht që nuk do të arrijnë askund në negociata me këto gënjeshtra”, ka shkruar Ghalibaf, duke shtuar se Trumpi “bëri shtatë pretendime në një orë, të shtatë prej të cilave ishin të rreme”.
Sa i përket Ngushticës së Hormuzit, Ghalibaf ka theksuar se me “vazhdimin e bllokadës [amerikane]”, ngushtica “nuk do të mbetet e hapur”.
Ai ka përsëritur deklaratat e mëparshme të zëdhënësit të Ministrisë së Jashtme iraniane, Esmail Baghaei, i cili ka thënë se “nëse ngushtica hapet apo mbyllet, dhe rregulloret që e rregullojnë atë do të përcaktohen në terren, jo në rrjetet sociale”.
Të dyja deklaratat nga Ghalibaf dhe Baghaei kanë ardhur pas një postimi në X nga ministri i Jashtëm iranian Abbas Araghchi, i cili ka shkruar se “kalimi për të gjitha anijet tregtare” përmes Ngushticës së Hormuzit është “plotësisht i hapur për periudhën e mbetur të armëpushimit”.
Ndërkohë, në Liban, 24 orët e para të armëpushimit 10-ditor kanë kaluar dhe ai duket se po vazhdon, pavarësisht akuzave të Libanit ndaj Izraelit për disa shkelje të armëpushimit.
