Zëvendësministri i Mbrojtjes, Shemsi Syla, ka thënë se një prej synimeve të kësaj ministrie është që Forcën e Sigurisë së Kosovës ta bëjnë forcë operacionale që ta mbrojnë integritetin territorial të Kosovës.
Syla ka përmendur edhe marrëveshjen e vitit 2013 në mes të ish presidentit të Kosovës, Hashim Thaçi dhe KFOR-it që FSK-ja të mos jetë e pranishme në Veriun e Kosovës për një kohë duke thënë se për sa kohë të jetë valide kjo marrëveshje Qeveria Kurti do ta respektojë dhe do të jetë në kontakt të vazhdueshëm me KFOR-in.
“Është një marrëveshje në mes të KFOR-it dhe ish presidentit Thaçi ku shkruhet se për një kohë ndalohet që FSK-ja të jetë në veri të vendit. Por, ne jemi në bisedime ku kryeministri Kurti pati një bisedë me Sekretarin e NATO-s, Jens Stoltenberg dhe për sa kohë të jetë në fuqi ajo marrëveshje, ne do të jemi në kontakt me NATO-n që FSK-ja të jetë në atë pjesë”, është shprehur Syla për Klan Kosova.
Tutje, Syla thotë se Qeveria e Kosovës do të jetë në vazhdimësi në shqyrtim të këtij vendimi që një ditë ajo të shfuqizohet dhe të ketë mundësi që FSK-ja të jetë në tërë territorin e vendit dhe se do t’i bëjnë të gjitha përpjekjet që ajo marrëveshje të mos jetë në fuqi.