YouTuberët në ditët e sotme po bëjnë gjithçka që të marrin sa më shumë shikime, e disa po shkatërrojnë veturat e tyre të shtrenjta.
Në këtë grup futet vlogeri rus Mikhail Litvin, i cili shkatërroi disa modele të ndryshme të veturave të markave të njohura, transmeton Telegrafi.
Litvin në tetor të vitit 2020 shkatërroi Mercedesin e tij AMG GT 63 S nga nervoza se i ishte prishur, e nga kompania gjermane ia kishin bërë me dije se nuk mund të rimbursohet me një tjetër të re.
Përveç kësaj, një vit më parë duke vozitur një Porsche Taycan Turbo S u fut në sallonin e Porsche, duke shkaktuar kaos të vërtetë, kurse më vonë pati deklaruar se kishte shtypur pedalin e gabuar.
E rasti i fundit i ka lënë zemërthyer shumë adhurues të markës gjermane BMW – kur ai vendosi t’i vë zjarrin një M5 Competition.
Nuk bëhet fjalë për veturën e tij, por të një miku. Pavarësisht kësaj, limuzinën luksoze gjermane e spërkati me benzinë, më pas i vuri flakën duke e goditur me shigjetë e hark që e kishte ndezur.
Se pse e ka bërë një gjë të tillë, akoma nuk dihet, por mediat ruse raportojnë se ka të bëjë me një incident që i ka ndodhur miqve të tij. /Telegrafi/