Dhjetra gra nga disa fshatra të Komunës së Prizrenit dhe Gjakovës si; Krajk, Gjonaj, Kushnin, Lubizhdë e Hasit, Dedaj, Lukinaj, Mazrek, Demjan dhe Romajë janë intervistuar me qëllim të mbledhjes dhe kompletimit të veshjeve tradicionale të Rajonit të Hasit.
Pjesët e veshjes me kollan kryesisht janë të punuara me veg, ku ka pasur funksionin ceremonial dhe ka paraqitur motivet floreale, zoomorfe dhe gjeometrike. Xharri, Setra dhe Burrnisa janë pjesët e jashtme të veshjes së Hasit, pjesë këto që janë përdorur nga gratë më të reja në momentin që kanë udhëtuar dhe që kanë shërbyer si formë e mbulesës dhe ruajtjes së veshjes.
Veshja e Hasit, përkatësisht veshja e grave me kollan, është veshja më specifike e të gjitha rajoneve të Kosovës, si nga pamja, funksioni, mënyra se si punohet, historia dhe në përgjithësi në ornamentikën e saj. Veshja e Hasit konsiderohet tanimë tradicionale, e cila në të kaluarën është përdorur si veshje e përditshme nga të gjitha gratë në Rajonin e Hasit. Sipas studiuesve konsiderohen tri funksione kryesore të kostumeve tradicionale: funksioni praktik, funksioni ceremonial dhe ai ritual, të cilat funksione këto veshja me kollan i ka pasur në të kaluarën dhe ornamentika e saj mund të kuptohet gjithashtu nëpërmjet motiveve kryesore që i ka paraqitur dizajni i veshjes; si ato gjeometrike, zoomorfe, kozmike, floreale etj.
