Shtabi i Përgjithshëm i Forcave të Armatosura të Ukrainës është deklaruar lidhur me premtimin rus për tërheqjen e trupave nga kryeqyteti ukrainas, Kiev, duke thënë se ky zotim është i dizajnuar për të mashtruar.

Në një përditësim në Facebook, Shtabi i Përgjithshëm tha se njësitë ruse po vazhdojnë të largohen nga Kievi dhe Çernihivi. Më 29 mars, Ministria e Mbrojtjes së Rusisë tha se do të zvogëlojë aktivitetin ushtarak në Kiev dhe Çernihiv dhe paraprakisht është deklaruar se do të fokusojë operacionet e saj në rajonin lindor të Donbasit.

Megjithatë, ushtria e Ukrainës beson se tërheqjet “janë ndoshta një rotacion i njësive individuale” që synojnë të mashtrojnë udhëheqjen ushtarake të Ukrainës dhe të krijojnë një “keqkuptim”.

Në postimin e Shtabit të Përgjithshëm po ashtu përmendet deklarata e zëdhënësit të Pentagonit, John Kirby, i cili ka thënë se vazhdon të ketë kërcënim për Kievin pavarësisht lëvizjeve të forcave ruse, që po largohen nga qyteti.