Ushtarë nga vende të ndryshme kontribuese të misionit të KFOR-it, të udhëhequr nga NATO, morën pjesë në Gjysmëmaratonën e Ditës së Shtetësisë së Hungarisë, e organizuar nga Batalioni i Rezervës Taktike të KFOR-it (KTRBN) në Kampin Bondsteel.
Gara, e cila vuri në provë qëndrueshmërinë fizike, vendosmërinë dhe shpirtin e ekipit, mblodhi 114 pjesëmarrës nga 10 shtete. Konkurrentët patën mundësinë të përshkonin distancën prej 21 kilometrash individualisht ose në formë stafete.
Në garën individuale triumfoi një vrapues rumun, ndërsa fitorja në garën e stafetës i takoi një ekipi amerikan.
Sipas KFOR-it, aktivitete të tilla kontribuojnë në ruajtjen e një niveli të lartë të gatishmërisë dhe ndërveprueshmërisë së pjesëtarëve të misionit. Ato shërbejnë gjithashtu për forcimin e bashkëpunimit dhe të frymës së miqësisë mes ushtarëve të vendeve të ndryshme që kontribuojnë në mision.
KFOR thekson se përmes këtyre aktiviteteve demonstron gjithashtu përkushtimin e vazhdueshëm për garantimin e një mjedisi të sigurt dhe të qetë për të gjithë njerëzit që jetojnë në Kosovë.
Misioni i KFOR-it vazhdon të zbatojë mandatin e tij, të bazuar në Rezolutën 1244 të Këshillit të Sigurimit të Kombeve të Bashkuara të vitit 1999, me qëllim që të kontribuojë në një mjedis të sigurt dhe të qetë, si dhe në garantimin e lirisë së lëvizjes për të gjithë, në mënyrë të paanshme.
Në përmbushjen e përgjegjësive të tyre, pjesëtarët e KFOR-it bashkëpunojnë ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në përputhje me rolet përkatëse si reagues të sigurisë.
