Presidenti i SHBA-ve, Donald Trump dhe presidenti ukrainas Volodymyr Zelensky zhvilluan një diskutim “produktiv” në margjinat e funeralit të Papa Françeskut, ndërsa Shtëpia e Bardhë rrit përpjekjet e saj për të arritur një marrëveshje për t’i dhënë fund luftës në Ukrainë, raporton CNN.
Drejtori i komunikimit i Shtëpisë së Bardhë, Steven Cheung, konfirmoi në një deklaratë të shtunën në mëngjes se Trump dhe Zelensky u takuan përpara funeralit të Papa Françeskut.
Trump dhe Zelensky “u takuan privatisht sot dhe patën një diskutim shumë produktiv”, tha Cheung.
“Më shumë detaje rreth takimit do të vijojnë.”
Trump dhe Zelensky nuk ishin takuar personalisht që nga një ndeshje e paprecedentë në Shtëpinë e Bardhë në shkurt, kur udhëheqësi amerikan qortoi presidentin ukrainas për mos demonstrimin e mjaftueshëm të mirënjohjes për mbështetjen amerikane në luftën e vendit të tij kundër Rusisë.
Gjatë atij takimi, si Trump ashtu edhe zëvendëspresidenti i SHBA-së JD Vance ngritën zërin, duke e akuzuar Zelenskyn se po pengonte një marrëveshje paqeje me Rusinë.
Takimi i së shtunës vjen mes një përpjekjeje gjithnjë e më urgjente të Shtëpisë së Bardhë për të arritur një marrëveshje paqeje.
Trump tha pas zbarkimit në Romë se Rusia dhe Ukraina ishin “shumë pranë” një marrëveshjeje për t’i dhënë fund luftës trevjeçare, pasi i dërguari i tij i lartë u takua me Presidentin Vladimir Putin të premten në bisedimet e përshkruara nga Moska si “konstruktive”.
Kievi dhe Moska nuk janë takuar drejtpërdrejt që nga javët e para të pushtimit të Moskës në shkurt 2022 ndaj fqinjit të saj më të vogël.