Duke u influencuar nga një lojë në rrjetin social “TikTok”, tetë nxënës në një shkollë në Kamenicë, kanë testuar njëri-tjetrit për sa kohë mund ta mbajnë frymën.

Drejtori i Arsimit në Kamenicë, Afrim Dervishi, ka thënë për KOHË-n se janë njoftuar prindërit të premten dhe ka kërkuar nga ta që t’i monitorojnë fëmijët gjatë qëndrimit në telefona.

“Është një rast në komunën tonë, ku tetë nxënës në klasën e tetë dhe të nëntë kanë luajtur një lojë në rrjetin social TikTok dhe kanë garuar se kush mundet me mbajtë frymën më shumë. E gjithashtu nxënësit janë mundur me duar ta ndalin frymën, e kjo e ka bërë më të rrezikshme. Kemi reaguar dhe gjithashtu i kemi njoftuar prindërit”, ka thënë Dervishi.

KOHA ka biseduar edhe me nxënësit e nivelit të mesëm të ulët në Prishtinë, të cilët kanë pranuar se qëndrojnë me orë të tëra në rrjetet sociale. Disa kanë thënë se qëndrojnë mbi tri orë duke lundruar në rrjetin social TikTok dhe Snapchat pa monitorim nga personat e rritur.

“Ato shkaktojnë dëme të mëdha në zhvillimin e njeriut. Unë rrjetin social që e përdor më së shumti janë lojërat e ndryshme dhe Snapchatin”, ka thënë një nxënës që vijon mësimet në klasën e gjashtë në një shkollë në kryeqytet.

Një tjetër ka thënë se është i vetëdijshëm për rrezikun që sjell përmbajtja e papërshtatshme për moshën e tyre në rrjetet sociale.

“Unë përafërsisht qëndroj dy orë në ditë pasi nuk është shumë mirë me qëndru në rrjete sociale, sepse ato ta hanë trurin. Më së shumti unë e përdor TikTok-un edhe pse është pak i rrezikshëm për disa fëmijë, pasi disa i fusin gishtat nëpër mprehëse dhe i qërojnë gishtat”, ka thënë një 13-vjeçar.

Sipas neuropsikiatrit, Ferid Agani, rrjetet sociale janë të dëmshme për fëmijët, pasi nuk u përshtaten nevojave intelektuale dhe emocionale të tyre.

“Nuk është i ndërtuar në ndërtim të aspektit të tyre intelektual, por më tepër në drejtim të plotësimit të nevojave të tyre epshore dhe të nevojave të tyre emocionale pa pasur një bindje intelektuale, pa qenë në funksion të ndërtimit të vetës dhe në këtë mënyrë kemi disproporcion të fuqishëm krijimin e situatës ku agresiviteti brenda fëmijës arrin në shkallë të lartë”, ka thënë ai.

Që nga viti 2019, ekziston infrastruktura ligjore për mbrojtjen e fëmijëve në internet.

E që nga viti 2017, janë përpiluar disa udhëzues për nxënës për ekspozimin ndaj  internetit. Nxënësit kanë thënë se asnjëherë nuk janë informuar për këta udhëzues.

Sipas ekspertit të rrjeteve sociale, Valon Canhasi, prindërit dhe institucionet arsimore duhet të bëjnë më shumë në vetëdijesimin e fëmijëve.

“Duhet prindërit të krijojnë mekanizma për monitorimin e sjelljeve online të fëmijëve, duke i instaluar aplikacionet që e bëjnë këtë gjë, duke biseduar me fëmijët, duke iu treguar mundësitë e sjelljes online, mundësitë e keqpërdorimit të fotografisë, emrit e gjërave të tjera që ata i bëjnë online”, ka thënë ai.
Javën e kaluar, 19 nxënës në Gjakovë janë vetëlënduar si pasojë e një sfide në internet.

Raste të njëjta janë raportuar në maj të këtij viti në Fushë-Kosovë e Lipjan, ku 20 fëmijë, të frymëzuar nga një lojë në TikTok, u vetëlënduan.