Kryeministri i Kosovës, Albin Kurti paraditen e së hënës ka pritur në zyrë ambsadorët e vendeve të QUINT-it.
Burime të Gazetës Online Reporteri.net bëjnë të ditur se, do të ketë edhe adresim para mediave në ora 10:00.
Shtetet e Bashkuara të Amerikës dënuan ashpër sulmin në kanalin e Ibër-Lepencit, duke thënë se do po monitorojnë situatën nga afër dhe do të japin mbështetjen për një hetim gjithpërfshirës, dhe se kanë ofruar mbështetjen e tyre Qeverisë së Kosovës.
“Shtetet e Bashkuara dënojnë fuqishëm sulmin e 29 nëntorit në infrastrukturën kritike në Kosovë duke dëmtuar një kanal ujor në Zubin Potok që është thelbësor për furnizimin me ujë të Kosovës dhe funksionimin e termocentraleve të Kosovës. Ne jemi duke e monitoruar situatën nga afër, do të mbështesim një hetim gjithëpërfshirës dhe i kemi ofruar mbështetjen tonë të plotë Qeverisë së Kosovës për të siguruar që personat përgjegjës për këtë sulm kriminal të identifikohen dhe të mbahen përgjegjës”, thuhej në reagimin e ambasadës amerikane në Prishtinë.
Në anën tjetër, ambasadori i Gjermanisë në Kosovë, Jorn Rohde, i cili e ka dënuar fuqishëm sulmin në kanalin kryesor të Ibër Lepencit, ka theksuar se ky sulm prek të gjitha komunitetet në mbarë Kosovën.
“Bëjmë thirrje për hetim të plotë dhe vënien e autorëve para drejtësisë. Gjermania është e gatshme të mbështesë autoritetet kosovare”, ka thënë Rohde.
Ambasadori i BE-së në Kosovë, Aivo Orav, e dënoi shpërthimin, teksa shtoi se u ka ofruar ndihmë autoriteteve të Kosovës.
“Dënoj incidentin e rëndë që shkaktoi dëme në kanalin ujor në Zubin Potok që po privon pjesë të konsiderueshme të Kosovës nga furnizimi me ujë. Unë u kam ofruar ndihmën e BE-së autoriteteve të Kosovës. Ngjarja duhet të hetohet dhe përgjegjësit të vihen para drejtësisë”, ka qenë reagimi i ambasadorit Orav.
Edhe Britania e Madhe ka dënuar këtë sulm. Ambasadori britanik, Jonathan Hargreaves përmes një shkrimi në Facebook tha se ky sulm duhet të hetohet shpejt se a është bërë me qëllim, pasi ka pasoja të rënda për furnizimet me ujë dhe energji.
“Incidenti serioz në Zubin Potok sonte ka pasoja potencialisht të rënda për furnizimin me energji dhe ujë në komunitete të ndryshme në shumë pjesë të Kosovës. Duhet të hetohet shpejt për ndonjë sulm të qëllimshëm ndaj infrastrukturës kritike”, tha ambasadori britanik.
