Shfaqja “Pylli”, e Teatrit të Qytetit “Bekim Fehmiu” – Prizren, është vlerësuar me tri çmime në Dyrrachium International Theatre Festival në Durrës, duke vazhduar kështu rrugëtimin e suksesshëm të kësaj shfaqjeje në skenat teatrore dhe festivalet brenda dhe jashtë Kosovës.
Juria e festivalit e ka vlerësuar shfaqjen me çmimet:
Best Supporting Actor – Alban Krasniqi, për rolin e Pieres (Burri 2);
Best Supporting Actress – Hajat Toçilla, për rolin e Sophie;
Best Scenography – Bekim Korça, për skenografinë e shfaqjes.
“Pylli” është vepër e dramaturgut francez Florian Zeller, ndërsa shfaqja në skenën e Teatrit “Bekim Fehmiu” është realizuar nën regjinë e Erson Zymberit.
Ky sukses vjen pas një tjetër prezantimi të rëndësishëm në EtnoFest në Kukaj, ku “Pylli” u vlerësua me çmimin për shfaqjen më të mirë, ndërsa Hajat Toçilla u shpërblye si aktorja më e mirë dhe Bekim Korça me çmimin për skenografinë më të mirë.
Dy prezantimet dhe vlerësimet në festivale dëshmojnë për rrugëtimin e “Pyllit” përtej skenës së Prizrenit dhe për interesimin që kjo shfaqje ka marrë në hapësirën teatrore rajonale. Për Teatrin “Bekim Fehmiu”, pjesëmarrja në festivale është njëkohësisht mundësi për prezantimin e trupës së teatrit dhe të krijimtarisë teatrore të Prizrenit në skena të tjera.
“Pylli” do të rikthehet në repertorin e Teatrit “Bekim Fehmiu” gjatë muajit tetor, ndërsa shfaqja pritet të vazhdojë edhe rrugëtimin e saj në festivale të tjera teatrore, ku është ftuar për prezantime të radhës.
Suksesi i “Pyllit” vjen në një periudhë të ngjeshur për Teatrin e Qytetit “Bekim Fehmiu”. Vetëm një ditë para ndarjes së çmimeve në Durrës, teatri solli në skenë premierën e re “Tymnajë”, vepër e Noah Haidle, me regji të Agon Myftarit.
Me premierën e “Tymnajës”, Teatri “Bekim Fehmiu” vazhdon programin e tij artistik me produksione të reja, ndërsa paralelisht mban në repertor shfaqjet e realizuara më parë dhe i angazhon ato në festivale teatrore.
Për drejtorin e Teatrit të Qytetit “Bekim Fehmiu”, Burim Mustafa, këto rezultate janë pjesë e një pune të vazhdueshme për të krijuar produksione që jo vetëm prezantohen para publikut të Prizrenit, por edhe udhëtojnë dhe përfaqësojnë teatrin në festivale brenda dhe jashtë Kosovës.
Rrugëtimi i “Pyllit” në festivale, vlerësimet e marra dhe rikthimi i saj në repertor, së bashku me premierën e re “Tymnajë”, pasqyrojnë një periudhë aktive të Teatrit “Bekim Fehmiu”, me fokus në produksione të reja, zhvillimin e trupës artistike dhe prezantimin e teatrit në skena të ndryshme teatrore.
Klikoni KËTU për tu bërë pjesë e kanalit të TV Prizreni në Youtube.
