Presidenti rus, Vladimir Putin, deklaroi të enjten, se lufta në Ukrainë sapo ka nisur, derisa u çoi porosi shteteve perëndimore që të përfshihen në betejë “nëse kanë guxim”, raporton Reuters.

Në një fjalim para Kuvendit, presidenti rus deklaroi se negociatat me Ukrainën do të zbehen aq sa të zvarritet konflikti i nisur më 24 shkurt të këtij viti.

“Sot dëgjojmë deklarata (të perëndimorëve v.j.) se duan të na mposhtin në fushën e betejës. Le ta provojnë. Ne kemi dëgjuar shumë herë se Perëndimi dëshiron të na luftojë deri në të fundit. Kjo është një tragjedi për popullin ukrainas, por duket se gjithçka po shkon drejt kësaj”, tha Putini në Dumën ruse.

Sipas liderit rus, refuzimi për dialog do të thotë zvarritje e arritjes së paqes.

“Të gjithë duhet ta dinë se, në përgjithësi, ne ende nuk kemi filluar asgjë seriozisht. Në të njëjtën kohë, ne nuk i refuzojmë bisedimet për paqe. Por ata që i refuzojnë duhet të dinë se sa më tej të shkojë, aq më e vështirë do të jetë për ta që të negociojnë me ne”, shtoi ai.

Rusia po e akuzon Perëndimin se po zhvillon një luftë të parabarabartë kundër saj, duke goditur ekonominë me sanksione dhe duke rritur furnizimin me armë të avancuara në Ukrainë.