Një qytetar nga Prizreni ka gjetur një kuletë me 1,410 euro dhe dokumente personale, të cilën më pas e ka dorëzuar në polici.
Sipas njoftimit të Policisë së Kosovës, rasti ka ndodhur më 28 shtator, rreth orës 19:20, në Stacionin Policor të Trafikut në Prizren.
Kuleta ishte gjetur në një market nga qytetari Selami Grki, i cili, sipas policisë, e kishte dorëzuar menjëherë atë në stacion, së bashku me paratë dhe dokumentet që ndodheshin brenda.
Përmes dokumenteve identifikuese, policia ka arritur të kontaktojë pronarin e kuletës. Ai është paraqitur në stacionin policor, ku ka marrë kuletën dhe paratë e tij.
Pronari ka shprehur falënderim për aktin e ndershëm të qytetarit, si dhe për angazhimin e policisë në identifikimin dhe kontaktimin e tij.
Policia e Kosovës e ka cilësuar rastin si shembull të përgjegjësisë qytetare dhe bashkëpunimit ndërmjet qytetarëve dhe policisë, duke theksuar rëndësinë e ndershmërisë dhe solidaritetit në komunitet.
Klikoni KËTU për tu bërë pjesë e kanalit të TV Prizreni në Youtube.
