Drejtoria Rajonale e Policisë në Ferizaj ka bërë të ditur se sot ka arrestuar nëntë persona në fshatin Berevce të Shtërpcës për prerje ilegale të drunjve në Parkun Nacional “Sharri” dhe ka konfiskuar pesë traktorë dhe disa motosharra e sasi drunjësh.
Aksioni i Policës është realizuar në orët e para të mëngjesit rreth orës 07:30 në pjesën e Parkut Nacional në fshatin Berevce të Shtërpcës.
Tutje në njoftim, Policia thotë se personat e arrestuar janë të moshës 20, 33 dhe 35-vjeçar.
“Ekipe të policisë të stacionit në Shtërpcë, të mbështetura edhe nga Njësia e Reagimit të Shpejtë (NJRSH), nga Drejtoria Rajonale e Policisë në Ferizaj, në bazë të disa informacioneve, sot në ora 07:30 kanë realizuar një aksion, sipas planit operativ ” Mbrojta e pyjeve 2022″ në pjesën e Parkut Nacional ” Sharri”, në fshatin Berevce të Shtërpcës. Në këtë aksion kanë marr pjesë edhe zyrtarët e Parkut Nacional ” Sharri”, thuhet në njoftimin e Policisë.
“Në kuadër të këtij aksioni janë arrestuar 9 persona , të cilët janë shoqëruar në stacionin policor në Shtërpcë dhe pas intervistimit nga policia, me vendim të Prokurorit të Prokurorisë Themelore në Ferizaj , 3 personat me inicialet L.N ( M/K) i moshës 20 vjeçar , A.A (M/K) i moshës 33 vjeçar dhe S.A (M/K) i moshës 35 vjeçar, janë ndaluar për 48 orë, ndërsa 6 personat tjerë janë liruar në procedurë të rregullt Ndërkaq, si prova materiale janë konfiskuar 5 traktor , disa motosharra dhe sasi e drunjtëve. Rasti është cilësuar Vjedhje e pyjeve”, shton Policia në njoftim.