Deputetja e Lidhjes Demokratike të Kosovës (LDK), Vjosa Osmani, ka kritikuar deputetët e Lëvizjes Vetëvendosje gjatë seancës së Kuvendit, pasi këta të fundit ngritën kritika ndaj qeverisjeve të mëparshme, duke përmendur korrupsionin dhe problemet e tjera gjatë mandatave të tyre.
Në fjalën e saj para deputetëve, Osmani ka kundërshtuar qasjen e pushtetit aktual për t’u krahasuar vazhdimisht me qeveritë e viteve 2014-2018. Sipas saj, institucionet aktuale duhet të vlerësohen në bazë të rezultateve të tyre dhe zotimeve që kanë marrë para qytetarëve.
Ajo ka theksuar se krahasimi i qeverisjes së tanishme me mandatet e kaluara nuk duhet të shërbejë si arsyetim për mungesën e rezultateve, pasi standardi i premtuar nga Vetëvendosje ka qenë pikërisht krahasimi i punës së saj me atë të viteve paraprake.
“Neve nuk do të na duhej një Raport i Progresit për të na e përplasur të vërtetën se si po jetojnë sot qytetarët e Kosovës. Për pushtetin e sotëm, a ka më marre sesa ju ta krahasoni veten me ata të vitit 2014, 2015, 2016, 2017 e 2018. Krahasohuni me veten sepse ky ka qenë standardi që e keni premtuar. Krahasojeni veten me vitin paraprak. Për këtë shërben raporti i Komisionit Evropian, ju krahason juve me veten tuaj në çdo vit”, ka deklaruar Osmani në Kuvend.
Duke iu referuar Raportit të Progresit të Komisionit Evropian, Osmani ka vlerësuar se dokumenti paraqet një pasqyrë shqetësuese për gjendjen në Kosovë, duke evidentuar mungesën e rezultateve të mjaftueshme në fusha të rëndësishme për qytetarët.
Sipas saj, vendi nuk ka arritur të shënojë përparimin e pritur në sektorët që ndikojnë drejtpërdrejt në jetën e përditshme të qytetarëve. Ajo ka kritikuar gjithashtu dallimin mes premtimeve të bëra nga pushteti dhe rezultateve të arritura gjatë qeverisjes.
“Raporti tregon se vendi ynë nuk ka arritur të shënojë përparimin e nevojshëm, të premtuar apo në rastin tuaj më mirë të them – përparimin e propaganduar. Përfundimi më shqetësues është se në disa fusha që janë ndër më themeloret në jetën e qytetarëve, Kosova nuk ka shënuar asnjë përmirësim”, është shprehur ajo.
Një pjesë të veçantë të kritikave, Osmani ia ka kushtuar edhe sistemit të drejtësisë, duke u ndalur te ndikimi politik në funksionimin e tij. Ajo ka thënë se Komisioni Evropian ka evidentuar se këto ndikime vazhdojnë të mbeten një pengesë serioze për garantimin e paanshmërisë së institucioneve të drejtësisë.
“Sa i përket sistemit të drejtësisë, Komisioni Evropian gjashtë vjet pas flet për ndikime politike të cilat vazhdojnë të jenë pengesë serioze në paanshmërinë e këtij sistemi”, ka deklaruar Osmani.
Deklaratat e saj në Kuvend janë fokusuar në përgjegjësinë e pushtetit aktual për të dëshmuar rezultate konkrete, duke vënë në pah se vlerësimi i qeverisjes duhet të bëhet në raport me premtimet e dhëna dhe përparimin e arritur nga një vit në tjetrin.
