Partia kryesore opozitare në Turqi shënoi fitore të thellë në zgjedhjet lokale të së dielës. Opozita ruajti kontrollin e saj mbi qytetet kyçe dhe bëri fitime të mëdha në qytete tjera duke shqetësuar presidentin Rexhep Taip Erdogan, i cili kishte vendosur të rimarrë kontrollin e këtyre zonave urbane. Me më shumë se 90 për qind të kutive të votimit të numëruara, kryebashkiaku aktual i Stambollit Ekrem Imamoglu, i Partisë Popullore Republikane, ose CHP, kryeson me një diferencë të madhe në qytetin më të madh dhe qendrën ekonomike të Turqisë.
Mansur Yavas, kryebashkiaku i Ankarasë, mbajti vendin e tij me një diferencë mahnitëse prej 25 pikësh ndaj kundërshtarit të tij, treguan rezultatet. Në përgjithësi, CHP fitoi bashkitë e 36 nga 81 provincat e Turqisë, duke bërë një depërtim në shumë bastione të partisë së Erdoganit. Ajo fitoi 37% të votave në mbarë vendin, krahasuar me 36% për partinë e presidentit, duke shënuar fitoren më të madhe elektorale të CHP që kur Erdogan erdhi në pushtet dy dekada më parë. Erdogan pranoi humbjen zgjedhore në një fjalim të mbajtur nga ballkoni i pallatit presidencial, duke thënë se partia e tij kishte pësuar “një humbje lartësie” në të gjithë Turqinë.
“Ne do ta respektojmë vendimin e kombit tonë. Fatkeqësisht, nëntë muaj pas fitores sonë në zgjedhjet e 28 majit, nuk mundëm të merrnim rezultatin që dëshironim në zgjedhjet lokale. Ne do të korrigjojmë gabimet tona dhe do t’i korrigjojmë të metat tona”, deklaroi Rexhep Taip Erdogan, president i Turqisë.
Ndërkohë kreu i opozitës turke tha se votuesit vendosën një rend të ri politik në Turqi. Kreu u CHP-së Ozgur Ozel tha se votuesit vendosën të ndryshojnë tablonë 22-vjeçare në Turqi dhe të hapin derën e një klime të re politike në vendin tonë. Fusha kryesore e betejës ishte Stambolli, një qytet me 16 milionë. Kryebashkiaku i Stambollit, pas fitores tha se nga sot Turqia do të jetë një Turqi ndryshe.
“Të dashur qytetarë, ju keni hapur derën për një të ardhme të re. Turqia do të jetë një Turqi ndryshe. Ju keni dhënë mundësinë për të hedhur hapin e parë drejt një Turqie ku demokracia, liria, barazia, racionaliteti, shkenca, dashuria dhe solidariteti do të lulëzojnë”, deklaroi Ekrem Imamoglu, kryebashkiak i Stambollit.
