Mandl për aplikimin e Kosovës në BE: Ky hap i rëndësishëm erdhi në kohën e duhur

Eurodeputeti austriak, Lukas Mandl, ka reaguar pasi Kosova ka nënshkruar aplikimin për anëtarësim në Bashkimin Evropian.

Mandl ka thënë se këtë hap të rëndësishëm, Kosova e ka bërë në kohën e duhur.

“Bota e lirë duhet të lëvizë së bashku si kurrë më parë kundër të gjitha llojeve të ideologjive të urrejtjes dhe formimit të tyre në sisteme autoritare. Ukrainës, Republikës së Moldavisë dhe Bosnje-Hercegovinës iu dha statusi kandidat. Në procesin e bashkimit evropian, procedura e vjetër e anëtarësimit ishte më shumë një pengesë sesa një ndihmë. BE-ja dhe pjesët e saj duhet të tregojnë ngjyrat e tyre për lirinë dhe paqen, dinjitetin njerëzor, demokracinë dhe sundimin e ligjit”, ka thënë Mandl, raporton “EPP”.

Ai ka shtuar se Kosova i përket Evropës, ndërsa qytetarët e saj i jetojnë vlerat e BE-së.

“Më së voni deri në këtë vit, duhet të jetë e qartë se çdo taktike dhe strategjie së pari duhet t’i paraprijnë vizionet. Të punojmë që institucionet e sotme të BE-së të kenë sukses të ndjekin frymën vizionare dhe t’i hapin rrugën Republikës së Kosovës për anëtarësim në BE”, ka thënë ai.

Presidentja e Kosovës Vjosa Osmani, kryeparlamentari Glauk Konjufca dhe kryeministri Albin Kurti kanë nënshkruar të mërkurën aplikimin për anëtarësim të Kosovës në Bashkimin Evropian.

Kryeministri Albin Kurti ka bërë të ditur se aplikimi do t’i dorëzohet Presidencës Çeke të BE-së në Pragë.