Lëvizja Vetëvendosje!, Qendra në Prizren, ka reaguar lidhur me pjesëmarrjen e stafit administrativ të Komunës së Prizrenit në protestën e sotme të kryetarëve të komunave.
LVV ka kritikuar përfshirjen e stafit komunal në protestë, ku mori pjesë edhe kryetari i Prizrenit, Shaqir Totaj, duke vlerësuar se institucionet publike dhe administrata komunale nuk duhet të përdoren për aktivitete apo beteja partiake.
“Institucionet publike dhe administrata komunale nuk janë pronë e kryetarit të komunës dhe nuk mund të trajtohen si mekanizëm mobilizimi për aktivitetet dhe betejat partiake”, thuhet në reagimin e LVV-së.
Sipas kësaj partie, shërbyesit civilë paguhen nga qytetarët për t’u shërbyer atyre dhe duhet të jenë të lirë ta ushtrojnë detyrën e tyre profesionale, pa presion apo udhëzime politike.
LVV ka ngritur edhe pyetje lidhur me pjesëmarrjen e punonjësve komunalë në protestë, duke kërkuar nga kryetari Totaj të sqarojë nëse ata janë liruar apo udhëzuar për të marrë pjesë.
“Kush e ka marrë këtë vendim, mbi çfarë baze ligjore dhe kush ka dhënë urdhër që administrata ta lërë vendin e punës?”, pyet LVV në reagimin e saj.
Lëvizja Vetëvendosje ka akuzuar pushtetin e PDK-së në Prizren se, sipas saj, po e trajton Komunën si “zgjatim të pushtetit partiak”.
Në fund të reagimit, LVV ka theksuar se Komuna është e qytetarëve. Administrata është në shërbim të qytetarëve. Jo të partisë dhe jo të Kryetarit.
