Kryeministri në detyrë i Republikës së Kosovës, Albin Kurti, mori pjesë në pritjen e organizuar nga Ambasada e Francës në Prishtinë me rastin e shënimit të Ditës Kombëtare të Republikës së Francës.
Me këtë rast, Kurti uroi ambasadorin francez Olivier Guérot, duke shprehur mirënjohjen për mbështetjen e vazhdueshme që Franca i ka dhënë Kosovës dhe duke vlerësuar marrëdhëniet e shkëlqyera ndërmjet dy shteteve.
Në fjalën e tij, kryeministri theksoi se Kosova, e lindur nga lufta për liri dhe drejtësi, ka zgjedhur demokracinë, sundimin e ligjit dhe të drejtat e njeriut si themele të shtetit, ndërsa nënvizoi se Franca ka qenë një mike dhe aleate e rëndësishme në momentet vendimtare për vendin.
Kurti rikujtoi se Franca qëndroi pranë popullit të Kosovës gjatë luftës, njohu pavarësinë e vendit një ditë pas shpalljes së saj dhe ka vazhduar të mbështesë forcimin e institucioneve demokratike dhe zhvillimin e shtetit të Kosovës.
Ai theksoi gjithashtu se bashkëpunimi ndërmjet Kosovës dhe Francës po thellohet përmes dialogut politik, bashkëpunimit institucional, shkëmbimeve kulturore dhe arsimore, duke e cilësuar integrimin evropian si një zgjedhje demokratike dhe strategjike të Kosovës.
Në fund të fjalës së tij, Kurti falënderoi ambasadorin Guérot për kontributin e dhënë gjatë mandatit të tij diplomatik në Kosovë, duke i uruar suksese në detyrën e radhës dhe duke theksuar se Kosova do të mbetet gjithmonë një vend mik për të.
