Pas dekadash pritjeje, Kosova po bëhet me një Depo Qendrore moderne të Barnave – një projekt që pritet të sjellë standarde të reja në ruajtjen dhe shpërndarjen e produkteve farmaceutike në vend.
Ministri i Shëndetësisë, Arben Vitia, ka njoftuar se punimet për ndërtimin e depos kanë nisur në qershor 2025. Objekti do të ketë një sipërfaqe prej 1,800 metrash katrorë dhe një investim afër 2 milionë euro, duke u ndërtuar sipas kushteve bashkëkohore për ruajtjen e barnave.
“Pas shumë dekadash, Kosova po bëhet me Depo Qendrore moderne të Barnave… pritet të funksionalizohet brenda vitit,” ka shkruar Vitia, duke shtuar se ky është një hap i rëndësishëm në transformimin e sektorit shëndetësor.
Edhe kryeministri Albin Kurti e ka cilësuar këtë projekt si një arritje të rëndësishme për sistemin shëndetësor të vendit.
“Shumë shpejt do të funksionalizohet Depoja Qendrore e Barnave që i ka munguar vendit për më shumë se 20 vjet,” ka deklaruar ai.
Ky projekt pritet të përmirësojë ndjeshëm menaxhimin, kontrollin dhe furnizimin me barna në institucionet shëndetësore të Kosovës.