Kosova dhe Shqipëria do ta thellojnë bashkëpunimin në interes të të dyja shteteve, ka thënë ministri i Mbrojtjes, Armend Mehaj.
Në takim me homologun e Shqipërisë, Niko Peleshi, Mehaj tha se u zotuan për partneritet në fushën e mbrojtjes.
“Edhe në këtë takim me vëllain, Ministrin e Mbrojtjes së Republikës së Shqipërisë, Niko Peleshi ndamë kënaqësinë me sukseset e përbashkëta gjatë këtij viti, duke u zotuar që edhe në vitin e ardhshëm të rrisim bashkëpunimin në fushën e arsimimit e stërvitjeve të përbashkëta ushtarake, me fokus në forcimin e gatishmërisë për ndërveprim operacional sipas konceptit ‘Smart defense’”, shkroi në Facebook.
Mehaj ka shtuar se së bashku, Kosova dhe Shqipëria janë më të forta.
“Bashkëpunimi bilateral Kosovë -Shqipëri dhe rajonal me vendet partnere në fushën e sigurisë dhe mbrojtjes, është në interes të të dyja vendeve dhe në funksion të paqes, stabilitetit dhe sigurisë rajonale e më gjerë”.