Pas shqetësimeve të fundit nga banorët e fshatit Bellobrad të Dragashit, kryetari i komunës, Bexhet Xheladini, ka zhvilluar një takim me kryetarin e Shoqatës së Gjahtarëve “Dhia e Egër”, Sherif Sylejmani, me të cilin bën të ditur se u dakorduan që kjo shoqatë të monitorojë situatën në terren dhe të raportohet çdo rast i paraqitjes së arinjve në zonat e banuara, si dhe të ndërmerren të gjithë hapat e mundshëm, brenda kompetencave ligjore.
Xheladini tutje ka theksuar se u bëjnë thirrje organeve qendrore të ministrive përkatëse, që të ofrojnë pëkrahjen e tyre institucionale në këtë drejtim, si dhe ka apeluar tek qytetarët që të jenë të kujdesshëm, të mos u afrohen arinjve dhe të mos i ushqejnë ata, si dhe të lajmërojnë menjëherë organet kompetente nëse vërejnë lëvizje të tyre pranë vendbanimeve.
Njoftimi i plotë:
“Të nderuar qytetarë, lidhur me shqetësimet e fundit që janë adresuar nga banorët e fshatit Bellobrad, qytezës së Dragashit dhe disa fshatrave të tjerë, ku disa arinj po shfaqen vazhdimisht rrugëve të fshatit dhe nëpër oborret e shtëpive, prita sot në takim kryetarin e Shoqatës së Gjahtarëve “Dhia e Egër”, z.Sherif Sylejmani, me të cilin diskutuam për gjendjen e krijuar dhe masat që duhen ndërmarrë për të garantuar sigurinë e qytetarëve.
Në këtë takim theksuam nevojën që të veprohet me kujdes dhe në koordinim të plotë me institucionet kompetente, me qëllim që të parandalohen incidentet e mundshme dhe të ruhet ekuilibri natyror.
Kemi rënë dakord që Shoqata e Gjahtarëve, në bashkëpunim me autoritetet komunale, të monitorojë situatën në terren dhe të raportohet çdo rast i paraqitjes së arinjve në zonat e banuara, si dhe të ndërmerren të gjithë hapat e mundshëm, brenda kompetencave tona ligjore, kur kemi parasysh faktin se ariu është në listën e kafshëve të mbrojtura.
Falënderoj përfaqësuesit e kësaj shoqate për gatishmërinë e tyre që, ndonëse me kompetenca ligjore të kufizuara, të japin kontributin e tyre me qëllim të ndikimit pozitiv në sigurinë e qytetarëve.
U bëjmë thirrje organeve qendrore të ministrive përkatëse që të ofrojnë pëkrahjen e tyre institucionale në këtë drejtim.
Njëkohësisht, apelojmë te qytetarët që të jenë të kujdesshëm, të mos u afrohen arinjve dhe të mos i ushqejnë ata, si dhe të lajmërojnë menjëherë organet kompetente nëse vërejnë lëvizje të tyre pranë vendbanimeve. Gjithashtu, dërgimi i fëmijëve në shkollë, sidomos në ato zona ku po shfaqen arinjtë, të bëhet nën përcjelljen e prindërve apo familjarëve.
Komuna e Dragashit është e përkushtuar të veprojë në mënyrë të përgjegjshme për të mbrojtur jetën e qytetarëve dhe për të ruajtur biodiversitetin e pasur të zonës sonë malore. Vetëm një bashkëpunim i mirë ndërmjet qytetarëve, institucioneve të sigurisë dhe autoriteteve kompetente mund të ndihmojë për ta tejkaluar këtë situatë.”
