Komisioneri i Gjuhëve në kuadër të Zyrës së Kryeministrit, Slavisha Mlladenoviq, ka thënë se është shkelur Kushtetuta e Kosovës me zëvendësimin e tabelave në veri. Sipas tij, në komunat me shumicë serbe fillimisht emri i vendbanimit duhej të shkruhej në gjuhën serbe pastaj në shqip.
Shefi i Zyrës së Bashkimit Evropian në Kosovë, Tomas Szunyog, të premten ka thënë se vendimi për zëvendësimin e tabelave në veri duhet të zbatohet vetëm pas konsultimeve me Komisionerin e Gjuhëve dhe duke interpretuar pozitivisht Ligjin për Përdorimin e Gjuhëve.
Në një intervistë për KoSSev, Mlladenoviq ka thënë se zëvendësimi i tabelave është dashur të bëhet në frymën e multietnicitetit dhe përbërjes etnike të popullsisë në veri.
“Është e nevojshme që fillimisht të shkruhet emri në serbisht, pastaj në shqip. Por mënyra si janë vendosur, shkel nenin 59 të Kushtetutës”, ka thënë ai.
Mlladenoviq ka paralajmëruar një takim me kryeministrin Albin Kurti për ta diskutuar këtë çështje.
Tabelat në gjuhë cirilike me emërtimet e vendbanimeve me shumicë serbe në komunat veriore të enjten janë zëvendësuar me tabela në të cilat emri i vendbanimit shkruhej edhe në gjuhën shqipe. Por të premten, shumica e tabelave janë ngjyrosur aty ku emri i vendbanimit ishte në gjuhën shqipe.
