Një skenar ikjeje si në filma ka ndodhur dje në Qendrën Klinike Universitare të Kosovës, ku një person i kërkuar nga Policia e Kosovës arriti të zhduket para syve të zyrtarëve policorë nga dhoma ku po trajtohej, për shkak të lëndimeve që kishte pësuar, pasi kishte shkaktuar një aksident, raporton Gazeta Sinjali.
Aksidenti i trafikut që ndodhi gjatë ditës së djeshme në Komoran, u bë ‘sebep’ që Policia fillimisht ta kap të dyshuarin që ishte shpallur në kërkim policor me urdhër të Gjykatës, si i dyshuar për kryerjen e një vepre penale. Burimet e Sinjalit brenda QKUK-së kanë bërë të ditur se në momentin që është konfirmuar se i dyshuari po kërkohej, zyrtarët policorë kanë kërkuar asistim të njësive policore për ta siguruar të dyshuarin.
