Nënkryetari i Lidhjes Demokratike të Kosovës, Lutfi Haziri, është deklaruar për takimin për Asociacionin në Ambasadën Amerikane.
Ai ka thënë se Asociacioni i komunave me shumicë serbe është kompetencë dhe përgjegjësi kushtetuese vetëm e institucioneve të Kosovës, e në radhë të parë të Qeverisë.
Ai ka thënë se orientimet e LDK-së për një marrëveshje përfundimtare, ligjërisht të obligueshme dhe me njohjen reciproke të saj, mbesin të pandryshueshme.
“Me ftesë të ambasadorit të SHBA-së në Kosovë, shkëlqesisë së tij Jeffrey Hovenier, sot kam marrë pjesë në emër të LDK-së në takim në të cilin konfirmova mbështetjen për procesin e dialogut të ndërmjetësuar nga BE-ja, me përfshirjen e plotë të SHBA-së. Orientimet e LDK-së për një marrëveshje përfundimtare, ligjërisht të obligueshme, dhe me njohjen reciproke në thelb të saj, mbesin të pandryshueshme”, ka shkruar ai.
Të martën në Ambasadën e SHBA-së në Prishtinë u mbajt një diskutim i mbyllur me zyrtarë shtetërorë, liderë politikë, diplomatë e organizata të shoqërisë civile, lidhur me Asociacionin e komunave me shumicë serbe në Kosovë.