“Më 19 nëntor 2020 do ta filloj mandatin e dytë në Asamblenë e qytetit të Kielit tash me një përvojë më të madhe në shumë aspekte”
“Më 19 nëntor 2020 do ta filloj mandatin e dytë në Asamblenë e qytetit të Kielit tash me një përvojë më të madhe në shumë aspekte”.
Kështu shkruan në një postim të tij në fb, Nue Oroshi, aktivist i njohur i komunitetit shqiptar në Kiel e më gjerë dhe anëtar i partisë më të madhe gjermane, CDU.
“Shpresoj se dalëngadalë mbas kalimit të pandemisë do të filloj ndërlidhjen e qytetit të Kielit me qytetin e Prizrenit”, shton ai, transmeton albinfo.ch.
“Në këtë qytet në asamblenë e qytetit janë 8 grupe politike, kurse CDU ku unë jam anëtar e veprimtar tash e pesëmbëdhjetë vjet është partia e dytë, me 14 asambleistë. Politika është një art i vështirë e sidomos kur i takon gjeneratës së parë të migrantëve që janë futur në politikë.
Të jesh asamblist në një qytet me 250.000 banorë ku janë vetëm 59 asambleistë nga 8 parti politike këtë ta mundëson vetëm demokracia gjermane, pa lënë anash edhe angazhimet e pandërprera që bëj tash e 15 vjet në CDU, si dhe përkahjen që më kanë dhënë mërgimtarët shqiptarë që jetojnë në Kiel”, shkruan më tej Oroshi.
Kieli është një qytet në veri të Gjermanisë, i cili ka 250.000 banor, është një qytet bregdetar dhe me një universitet shumë të vjetër. Është kryeqytet i Republikës së Schleswig- Holsteinit, e cila ka 2.9 milionë banorë. Dallon sidomos me rrugëtimin e anijeve që nisen nga ky qytet për në shumë vende te botës.
