Në kuadër të aktiviteteve për shënimin e 27-vjetorit të themelimit të Policisë së Kosovës, po zhvillohet projekti “Rreze drite në emblemën time”, i cili synon të afrojë fëmijët me Policinë dhe të përcjellë te brezi i ri vlerat e bashkëpunimit, respektit, sigurisë dhe besimit.
Projekti, me moton “Një rrugëtim i përbashkët, një mision i përhershëm”, po realizohet në të gjitha drejtoritë rajonale policore.
Përmes tij, fëmijët kanë mundësi të shprehin kreativitetin dhe këndvështrimin e tyre për Policinë, duke e parë emblemën jo vetëm si simbol institucional, por edhe si emblemë të shërbimit, mbrojtjes dhe përkushtimit ndaj qytetarëve. Fëmijët kanë pasur mundësi edhe të veshin uniformën e Policisë, të dizajnuar dhe përshtatur për ta.
Sipas Policisë së Kosovës, aktiviteti u mundëson fëmijëve të njihen më nga afër me punën e zyrtarëve policorë, ndërsa për Policinë përfaqëson një hap tjetër në ndërtimin e marrëdhënieve të qëndrueshme me komunitetin dhe edukimin e brezave të rinj për një shoqëri më të sigurt.
Në 27-vjetorin e saj, Policia e Kosovës ka theksuar se mbetet e përkushtuar që, krahas ruajtjes së rendit dhe sigurisë, të jetë sa më pranë qytetarëve, veçanërisht fëmijëve dhe të rinjve, duke kultivuar besim, respekt dhe bashkëpunim.
Klikoni KËTU për tu bërë pjesë e kanalit të TV Prizreni në Youtube.
